中國燃氣（384）今年2月喺1.75元見頂回落，6月最低見1.14元，整固咗4個月，浪底逐步上移，上個禮拜成交轉趨活躍，股價回升，似蓄勢待發。隻股噚日收1.32元，冇升跌。有散戶開始對佢有興趣。
喺「Yahoo討論區」內，網友pat3933問：「384能不能買？請提供意見。」
clarksonhk嘅分析比較正面：「中國燃氣應該幾好，不過公用股要長線持有，因為初期投資好大。」
k6k169嘅睇法較保守：「前年年尾到上年由$0.8上到最高$1.7，𠵱家嚟講冇咩特別收購。再者之前收購同開發都要等一段時間先有大啲回報。」
中線睇$1.6
BIGFISH999就叫佢唔好心急：「隻嘢冇乜好，如果都想入，只要每日掛$1.25，遲早會入到，使乜急。」
中燃主要業務係買賣天然氣同燃氣管道建造。𠵱家內地天然氣佔全國總能源總耗量3%，遠遠低過全球平均嘅23.8%。基於環保理由，中央計劃喺2010年前，將天然氣喺能源結構中嘅比重提高至能源總耗8%。喺祖國搞天然氣業務，大把前途。
中燃另一賣點係背景夠硬淨，根據彭博嘅資料，大股東係隸屬中國國務院嘅海峽金融，持股11.06%，其他大股東仲有中石化（386）、印度政府旗下最大石油公司GAIL、阿曼政府控制嘅OmanOil，三者持股量都係7.18%，大股東全部猛料。
隻股預測PE16.5倍，P/B2倍，估值唔算離譜。技術走勢上，近幾個月正營造圓底收集形態，MACD係雙牛訊號，上星期以大成交升破短期降軌阻力後，呢幾日有回吐，正好上車，博中線見1.60元，跌穿1.22元止蝕。
余文