近年經常揹鍋嘅康文署最近參加咗喺上海浦東世紀花園舉行嘅「2006上海國際立體花壇大賽」，人哋個比賽嘅主題係「地球．家園」，一共有15個國家共80幾件作品參加，康文署件參賽作品就叫做「努力爭上游，更上一層樓」，而且仲不忘展示愛國嘅訊息。
康文署用超過15,000朵紅色、粉紅同白色嘅海棠，喺湖中砌咗六條中華白海豚出嚟。康文署話，每條海豚心連心向中心飛躍，寓意香港回歸祖國後，萬眾一心，全力向上。聽落真係有啲肉麻，不過就顯示咗康文署真係非常政治正確。至於康文署贏唔贏到，就要下個月先知；參賽作品展覽完畢後，會交由主辦單位負責養護，所以香港冇得睇。