旺角前南華戲院，今年初由「旺角站」改名為「東京銀座」後，銷情改善，賣出超過75%，呎價1.8萬至1.9萬蚊。
東京銀座業主之一嘅海港地產主席黃海明年初時講過，會向買家提供首兩年9厘租金回報，個場由大業主負責招租。最近，大業主不斷搞宣傳，搵嚟藝人洪欣、姚樂怡同麥長青等撐場。
東京銀座總共有200幾個舖位，除地下外，1樓佔140個，2樓有125個，面積50幾至百零呎，呎租30至40蚊，入場費3300蚊，最貴都係9000零蚊。
另外，地鐵將軍澳君傲灣商場君薈坊，10月1號開業，黃金周期間商戶生意都好好，太興燒味話，以座位營業額計算，已名列所有分店頭三位；QBHouse新一代剪髮店最高一日有超過150名顧客。