豪宅銀碼大，買家又要求高，往往會睇好多區，比較不同盤，閒閒哋成年至做成單「刁」。
有個客想搵個幾千呎複式，就用1年時間，睇晒中半山同南區物業，日前終於揀咗薄扶林貝沙灣2期3座頂層複式，鍾意佢有成3810方呎，間隔4房，有平台同天台，同享無敵海景。
單刁雖然花咗唔少時間、精神同耐性至做成，但成交價4150萬，每呎10892蚊，兩邊收佣都好和味，辛苦啲都值得。
中原程楚茵話，個客係升級換樓自住，覺得呢個複式罕有，兼且價平抵買。原業主係投資者，舊年4月以4533.9萬買入，點知其後市況轉靜，無人接貨，於是放租17萬，亦租唔出，最終只好蝕賣，損失383.9萬離場去，唔見8.5巴仙。
程楚茵補充，貝沙灣2期尚有1個複式放盤，面積3100幾呎，但只有3房，開價4050萬元，計落仲貴，所以個客咪揀咗以上單位囉。
電郵地址：[email protected]