噚日怕醜仔同事倪社問我，佢過幾日約咗個女仔去街，送乜見面禮好？我嚇佢，有人話鑽石係送畀女人嘅最佳禮物，或者送卡地亞手錶、TIFFANY手鐲都包保唔會錯。
見佢面都青埋，我極力忍住笑，好嚴肅咁同佢講：「不如食個hightea慢慢傾。」見佢請食嘢，我就盡吓人事教佢啦。
其實𠱁女仔唔一定吓吓講$$，稍為有童真嘅女仔都唔會抗拒卡通精品，但HelloKitty、麥嘜、多啦A夢、軍曹呢啲可能太細路，送嚟自法國嘅《小王子》LePetitPrince就最穩陣，好多有品味嘅女仔都鍾意，個故事有講小王子對玫瑰嘅愛情，好有意思。
今日開始至17日，小王子喺銅鑼灣崇光6樓會有個義賣，場內售賣20幾款小王子精品，包括水晶座、相架同公仔擺設等。首選係全港限售10個嘅60周年別注版figure座枱萬年曆，售299元，同場仲展出大量法國空運嚟嘅小王子非賣品。買滿100元仲可以參加競投18吋小王子figure，底價1,943元，款項捐畀兒童癌病基金，咁有愛心，女仔實冧！^o^
逄周一至周四刊出