我叫浚浚，剛滿兩歲。坐了人生第一趟的飛機，目的地是布吉。點解要揀陽光海灘嘅布吉？唔知呀！爹哋同媽咪鍾意囉，4日3夜的短短行程，我們一家三口留在酒店的時間比較多，因為一出town，見唔到fishfish，我就會喊喊㗎啦！
記者：李莉
部份照片由被訪者提供
慶祝2歲生日 舉家坐Planeplane
去布吉，我想是爸媽個人的喜好，因為我的兩個超級運動型爸媽，上山落水無一不好。自從我出世，他們倆很久沒有去潛水滑雪，全副心機都放在我這個寶貝身上。不過，為了我成為健康Baby，三、四個月開始爹哋已經揹住我上山落海，我由初初喊到豬頭，到𠵱家，嘻嘻！媽咪話我直頭想fing開個水泡自己游呀！所以，為了慶祝我兩歲生日，他們再也按捺不住，決定一家三口去布吉旅行充充電！當然，在布吉之外他們亦有考慮其他地方，但媽咪話：「BB仲好細，怕坐長途機舞佢唔掂喎！」去布吉路程短短哋，又有一家大細都鍾意的大海，這個首次飛行，嘩！我好期待呀！
帶住未夠2歲的Baby（那時我還欠2天才生日嘛！）爹哋講明一間設施完善的靚酒店最緊要。所以，爹哋同媽咪決定揀當年拍拖時代的EvasonPhuket！雖然有多名親友話：「Evason好似適合情侶多啲喎！」不過，佢哋反而覺得無所謂，皆因Evason有個對住大海嘅infinitypool，日日對海浮游池水之間已夠我們一家三口enjoy再enjoy啦！而且Evason又有個私家島，船程唔使15分鐘，連我第一次坐快艇都冇𠵱嘩鬼叫！
EvasonPhuket查詢：www.sissenses.com/evason-phuket
私家島餵魚魚 腳板痕痕
去到私家島嗰日，全灘得我一個Baby，個個對我都額外呵護備至，原本我同媽咪玩堆沙，但隔籬個日本姐姐好好笑容送我麵包，我一口咬落去，點知姐姐同媽咪即刻阻止，啊！原來啲包包係餵魚仔㗎喎！fishfish呀！媽咪，係我最鍾意嘅fishfish呀！我一伸手將麵包放入水，啲魚魚就成堆成堆游埋身，好驚呀！媽咪即刻捉實我隻手仔想拉我行遠，但我又唔捨得喎……爹哋就掛住影我哋，然後一邊笑我又要驚又要餵，我得2歲咋，第一次近距離有千軍萬魚唧我隻腳板底，點會唔驚呢！
水族館繼續看魚仔
一見魚，我就手舞足蹈，成個人生猛晒，所以，四日入面，爹哋媽咪都係主力同我去看魚。布吉水族館內千變萬化的水世界我看到目不轉睛，每次爹哋要抱我走我就扭晒計，喊晒口，我真係好鍾意魚魚，爹哋就趁機教我認邊啲係小丑魚，邊啲係金魚、珊瑚魚及石斑，返到香港我對住啲相話畀姑姐聽，佢仲大讚我叻仔㖭！唔怪得有人話旅行時教BB嘅嘢，佢哋特別易入腦啦！
驚驚青青睇象象
平時喺card上學嘅動物名，今日嚟到布吉動物園，唔止可以近距離接觸，媽咪仲話畀我試吓騎大笨象㖭。吓！好緊張呀，我一直喺隻大笨象前望吓望吓，想伸隻手出去但又怕，嗰樣仲驚驚青青，爹哋要抱我去餵大象，我竟然扭計……最後因為人數太多，我哋騎唔成大笨象呀……不過，籠外見到Tiger、小鳥，好得意好興奮呀！
一出town就喊！
食飯，基本上我哋主力留喺酒店，選擇多呀，媽咪都帶咗個水煲煲熱水煮奶奶等我臨瞓前飲。而且我𠵱家基本乜都食得，魚呀！菜呀！肉呀！只要剪到細細粒就得喇！當然全部唔准辣，仲要少啲油㖭！但最後一晚爸媽要帶我去巴東夜市見識喎！咦，好多人呀！又冇fishfish睇嘅！我要fishfish呀！哇……爸爸回港後跟嫲嫲說：「你個孫一定要有魚喺左近，否則狂喊……唉！」Yes,Ilikefish!!下次再去旅行，我都要去有魚魚嘅地方呀！
其他好選擇
EvasonPhuket之外，布吉仲有很多針對一家大細旅遊的酒店，這些度假酒店設施非常多元化，就算足不出戶都不會悶！
1.LagunaBeachResort
位於大型度假村Laguna內，這間酒店開宗明義是FamilyResort，酒店內更設有Kids'Club及小型遊樂場，前者活動主要針對4-12歲小朋友，4歲以下的，玩沙又或在遊樂場耍樂一樣開心！
查詢：www.lagunabeach-resort.com
2.ClubMedPhuket
ClubMed一向是不少家庭去旅行的心水選擇，留足三日在酒店都有排山倒海的節目，而ClubMedPhuket更設有三種不同的兒童俱樂部來照顧不同年齡小朋友的需要。唔想煩要假期有人幫你安排埋，這是不俗之選，惟價錢較貴！
查詢：www.clubmed.com.hk
Plan好啲
心郁郁即刻想同寶貝Baby同遊布吉，我哋幫你plan好行程，起飛啦！
金句：有Baby一齊，Relax啲，唔好趕鴨仔！
Day1
香港－布吉
好好在酒店休息！
Day2
早：沙灘玩水
午：布吉奇幻不夜城
晚：酒店
Day3
早：去布吉動物園騎象象＋布吉水族館
午：酒店小休，泳池嬉水
晚：巴東夜市搵食
Day4
返香港啦！
專家有意見：嚴選酒店
1.BB同遊布吉，選間酒店至重要！
2.布吉動物園，細，但個個細路都興奮！
3.必去奇幻不夜城（PhuketFantasea），有布吉Disney美譽，好玩！
執齊晒 必備BB安眠藥
專家有意見：李家仁醫生話有得揀，最好唔同BB去旅行，因為真係好煩！而且2歲以下根本唔會有咩記憶，去過邊都唔知，冇意思！但如果你真係好想同BB去玩，呢啲唔少得！
平安藥：退燒、止咳、止嘔、止屙、BB用瞓覺藥（生暴地方怕瞓唔着）
外套仔：泰國冷氣一樣勁，唔好凍親BB
其他：奶粉、隨身熱水壺、蒸餾水、蚊怕水、BB日常用品、太陽油、少量米粉之類
Parents'sBlog：起飛前飲定水！
上網，一般家長同BB坐飛機，最擔心係遇上氣壓耳仔痛痛！其他有相同經驗的家長即時回應：起飛前飲水，都可以減壓㗎，但一定要起飛前！而李家仁醫生仲有一個方法，就係baby最鍾意嘅奶嘴，啜實都有啲用嘅！
相關網址：www.baby-kingdom.com
跟團去：玩五日唔使二千
團名：布吉哈哈島（野生森林之旅）超值抵玩團
團號：HKT05SPC
價錢：成人$1,899起 小童$1,599起（兩歲以下$799）
讚：有得坐大象入森林，好玩！
去文化村有多種活動，有趣味！
價錢好抵，買張機票都唔得啦！
彈：有一日是自由活動，冇行程！
去哈哈島船程或有大浪，不太適合BB仔！
而且要在曼谷轉機，BB會較辛苦！
查詢：21088888（康泰旅行社）
自己去：1張飛兩個人用
即日起至10月31日期間預定ClubMed布吉島5日4夜全程假期，2位成人同行，只需1張機票！
價錢：首位成人$6,200起，第二位成人$3,820起
2歲以下：$1,120
2-3歲：$2,720 4-11歲：$4,200
讚：ClubMed難得有優惠，第二位唔使機票錢，好吸引！
價錢包晒活動節目同美食，唔使煩！
彈：要在10月31日前出發，優惠期太短！
查詢：31119388（ClubMed）
出門handbook
簽證：持有效特區護照或BNO均免簽證。
查詢：25216481（泰國領事館）
機票：乘泰國航空經曼谷至布吉，價錢$3,378起。
查詢：www.zuji.com.hk
貨幣：1港元約兌5泰銖
長途電話國家區號：66
旅遊查詢：hk.travel.yahoo.com/city/phuk/spot.html
天氣預測
今日布吉
氣溫23-28℃
濕度84％
明日
氣溫23-28℃
濕度85％
後日
氣溫23-28℃
濕度85％
布吉受季候風影響，全年溫暖潮濕，分為旱季和雨季。
雨季：5月-10月，吹西南季候風，時有大雨，平均30℃，海時有大浪。
旱季：11月-4月，吹東北季候風，3月最熱平均有34℃，1月最涼，入夜後約21℃。