滙豐香港網站現有嘅介面用咗好幾年，將會喺禮拜六正式「退休」，第二代滙豐香港網站嘅新面貌，今個禮拜日出爐，滙豐嘅網站近日已經貼出告示，鼓勵客戶瀏覽示範網頁。華華睇番個新設計，其實同舊嘅分別不大，只係個別功能嘅擺位有啲唔同，聽講，香港嘅第二代網站設計，係想同集團嘅網站設計調番準啲。
另外，市場期待工商銀行快要嚟香港上市，唔知係咪有人想攞景兼贈興，噚日工行個仔仔工銀亞洲，發現咗一個欺詐網站，域名為www.hev-kloten.ch/images/loginaccount/PIB.html，該網站與工銀亞洲嘅官方個人網上理財網站相似。
東窗事發改頭換面
不過，有趣嘅係當事件被人揭發之後，個網站嘅介面迅即被轉換，變到連告發佢嘅工銀亞洲都話唔認得，唔通滋事分子知道「東窗事發」之後即改頭換面？手腳好快啫，十足快閃黨。