沒有煙抽的年代，董橋想像不到，2007年1月1日起，《小風景》背後的縷縷煙圈，正式被甜膩的巧克力及惹味的魷魚絲取代，已屆64之齡的他自言很難接受，已隨時準備好退休後到英國定居，以保存最後人生樂趣。
生有時、死有時，董橋不相信煙草會奪他的命，一條室內禁煙條例，只令他自覺是小眾、是老一輩，「金庸寫武俠小說，都係邊寫邊煲煙，佢𠵱家都話戒煙；倪匡唔care。我哋係minority（小眾）、seniorcitizen（長者），自我感覺唔好，大家都費事傾啲咁傷心嘅事。」
糖果零食頂煙癮
董橋堅持好文章「靠煙煲出嚟」，一禁煙，文化質素必會低落，「後生嘅真係好少食煙，西方禁咗煙之後，啲書都冇以前咁好睇，冇咗煙，文化氣息就會冇咗。」再追問文化質素是否會因禁煙而衰落，這位散文大家只是一臉悲傷，說不出所以然來，「又唔係話creativity（創作）冇咗，但係個taste（品味）會唔同咗。」有點牽強，沒有科學根據，董橋心知肚明，只是點了煙，心裏就舒泰安定。
開宗明義支持宿命論的他，說着說着，又說其實每次聽到人家說吸煙的害處，心裏也有點怕，「成日都話食煙會咁會咁，會生cancer（癌症），聽得多都冇癮，半信半疑，第時寫嘢可能要食糖、食零食。」董橋笑了笑，又搖搖頭。
董橋說，還是要回英國定居去，躲在後花園，看看書、抽抽煙，甚麼都好。有了這個想法，人不再忐忑紊亂，小風景終有一刻閑靜：幸好倫敦的仲夏等着他，點了燈的後花園也等着他。