港股大跌1日後又大升1日，市勢好波動，恒指1個月內上升近千點，在18000水平，好淡爭持會好激烈，個人雖看好後市，但在現水平略為整固，則對後市的升勢更為健康。
富豪酒店（078）升1仙，在升破0.70元的圓底頂部後，中期上升大浪已確認，但呢隻係慢熱股，想賺佢錢，要有耐性，相信1個月內，股價可升上0.85元，升幅有20%！
金威集團（910）個勢愈來愈強，高收0.62元，升3仙，成交更大增到1.66億股，係05年1月中以來嘅最高紀錄，今次創出99年以來嘅新高，而又有大成交配合，中期上升目標可調高至0.95元。
4個月來，推介金威3次，一次係6月8日，當時股價0.335元；第2次係8月18日（股價0.445元）；第3次係9月28日（股價0.57元），噚日金威股價已比第一次推介時上升85%，而且睇勢仲有得去，可繼續以上移止賺位持有。
投資首要當然係眼光，但亦要有信心、同抗拒獲小利的誘惑。好似隻中糧（506），噚日升到6.75元，又升8.1%，由推介時的4.25元計，升幅已達58.8%。至於金威，揸4個月賺近1個開，期望年底可更豐收。
佑威確認展新升浪
當然，除咗眼光同信心外，亦要嚴守止蝕，當股價唔對路，跌10%（極其量係15%）就要離場，賺錢時賺到盡，蝕錢時亦唔會傷。
由金威講到佑威（627），呢兩間原本都係成衣股，其後齊齊轉型納米，其後金威又再轉型高科植林，股價亦已由低位大升幾倍。至於佑威，繼續成衣同納米本業，但就大力發展零售業務，而且仲得到大行垂青，近日股價已有異動，由0.22元升上噚日高位0.27元，成交更大增到6550萬股，係20多個月來的高紀錄，有大成交行先，股價已確認開展新升浪，同樣係嗰句，期望年底可豐收。
郭兆誠