正所謂人算不如天算，本來充滿前景嘅屯門新港澳碼頭，卻遭澳門政府否決申請，聽講澳門政府話佢哋嘅碼頭，再難承受更多嘅港澳航班，所以「西北航運」嘅屯門線申請冇得傾。
故事突然出現咁嘅發展，自不然有人要犧牲吓。屯門邁亞美海灣有個業主，俾個港島居屋換樓客藉碼頭新聞壓價，卒之佢個3座低層F室，只賣得110萬，美聯陳世豪分析，以屋苑573呎全海景單位計，呎價2000蚊都唔到，真係算平。
原業主97年以285萬摸頂買入，上年6月已經放盤，最初叫價138萬，都冇諗住見家鄉，早排減到去120萬，突然話新碼頭無緣過大海，連最後希望都冇埋，輸六成幾，富貴原是一場夢。
陳經理話，新碼頭「窩河」一事，令到碼頭區唔少業主都要減價賣樓，邁亞美成交呎價較上月同期調低咗10巴仙，至1900蚊。