恒生銀行前董事長利國偉退休多年，但金融界人士並無遺忘佢。證券專業學會喺本周一舉行秋季晚宴，正式宣布利Sir成為該學會2006年度嘅榮譽會員。主席關百忠致辭時話，利博士唔單止係出色嘅銀行家，佢積極推動本地證券及金融業發展，又熱心教育，可謂建樹良多。
利Sir曾經擔任金融業界多項要職，除咗恒生董事長外，又做過聯交所主席，政治方面就做過行政立法兩局議員，97年獲大紫荊勳章。
利Sir當晚要坐輪椅到場，而出席晚宴嘅不乏聯交所現任同舊人，包括港交所主席夏佳理、行政總裁周文耀，舊友則有聯交所另一前主席鄭維健、前行政總裁徐耀華，加埋證監會行政總裁韋奕禮，齊齊為利Sir慶祝。