女生為減肥，三日唔食飯視作閒事，值唔值就見仁見智，餐廳公關Haily就絕對唔會為減磅而節食，因為佢有佢嘅健康餐單，就係食齋：「每逢初一、十五全日食齋，平時大部份日子嘅午餐照食齋。」嗱，唔該望望相，佢原來差不多40歲，個樣似30歲未夠，唔少客人都大讚佢Keep得好，「客人成日問我喺度做咗幾多年，我次次都話做咗十幾年，佢哋次次都唔信，話我個樣後生，又問我結咗婚未，其實我都唔後生，個仔今年都十幾歲喇。」食齋真係可以青春常駐？「食完齋覺得皮膚Keep得唔錯，可能因為齋菜纖維豐富，幫助腸胃消化，新陳代謝自然好。大部份齋菜由豆類製成，營養會比較均衡啩？」聽落食齋的確好處多，不過餐廳似乎唔多後生女幫襯喎，「十年前我哋Keep到班後生女熟客，佢哋都好Buy食齋，認為係健康KeepFit食療，但隨住纖體同減肥公司愈開愈多，呢班客人就流失咗喇。」唉，其實畀咁多錢啲減肥公司把鬼咩，想皮膚靚靚身材好，學Haily食齋仲健康啦，佢𠵱家每一日都會去餐廳試菜兼同客人傾偈，想偷師咪同佢嗲兩句囉。
記者：黃若茵 攝影：周旭文
巴燒黃沙卷$38
Haily：「腐皮卷包住翠玉瓜同素雞，醬汁係巴基斯坦咖喱，不過多數食齋嘅人唔食得好辣，咖喱只屬微辣。」
原個南瓜海鮮湯$48
Haily：「最受歡迎菜式，用日本南瓜仔去做，湯加入南瓜肉、素海鮮粒同青豆，又甜又飽肚。」
嚐回味$32
Haily：「大豆纖維模仿東坡肉，加自製芡汁味道幾可亂真。」入口有煙熏香味，比真正東坡肉更香口。
食客評分（5分滿分）
普光齋（23842833）
地址：九龍佐敦道13號華豐大廈地下