森美同小儀今年六月因為喺電台節目《架勢堂》內舉行「我最想非禮嘅香港女藝人」網上投票，事後俾好多團體批評係侮辱女性，商台為咗息眾怒，結果要將佢哋停職兩個月，而森美拍嘅大家樂廣告當時都收到投訴，所以廣告商只好抽起佢嘅一切宣傳，雪到佢合約結束為止。
金牌不滿被雪
至於金牌旗下另一位歌星方力申同樣係大家樂嘅廣告代言人，佢就當然唔受影響，不過金牌發言人陳小姐噚日話：「呢個飲食集團指當時有人投訴，所以抽起森美嘅廣告宣傳，但我哋喺該集團所公布嘅業績，睇唔到用佢（森美）做代言人對佢哋會有乜嘢影響 ，所以公司係覺得好遺憾。以後同呢個集團傾合作會考慮清楚啲。」
雖然有廣告商對森美有意見，但無綫就一樣咁睇佢，暫定喺台慶前大半個月，即係10月23號，佢會同小儀再主持10集《15/16》，到做完喺11月4日舉行嘅《翡翠歌星賀台慶》之後，接住佢兩個仲會做一個長達一小時嘅特別版《15/16》，睇嚟森美真係有排忙。