35歲嘅法國「神經刀」巴夫斯喺周中正式宣布掛靴，對球壇嚟講算係一大損失，始終，佢都曾經威風一時，而且係法國歷史性奪得98世界盃嘅功臣之一；今次我哋就特登搵咗「神經刀」職業生涯嘅比賽精華，畀大家回顧一下此「刀」有幾「神」！
呢段名為《FabianBarthezAmazingGolie》嘅短片，長4分17秒，收錄咗巴夫斯喺馬賽、摩納哥、曼聯同法國國家隊時期嘅精采撲救；睇睇吓，你都咪話「神經刀」唔係鋼門呀，癲起嚟分分鐘連保方、雲達沙同簡尼都唔係佢嗰班！
唔少巴夫斯嘅fans都「捨不得佢」，Schwarzenegger47謂：「或者佢唔係最勁嘅門將，但喺世界盃就從未甩拖，將自己嘅質素同天份表現晒出嚟。」trezegoal直言：「我超鍾意巴夫斯，佢從未令法國人失望，簡直係國家嘅傳奇人物！」
經典一刻相集感人
此外，球迷真係好鍾意「神經刀」嘅話，亦可以搵吓名為《FabienBarthez》嘅slideshow，當中不乏「經典一刻」，雖然只係相集，但都幾感人㗎！如果睇晒都未夠喉，就建議球迷等多陣，相信表演慾旺盛嘅巴夫斯，好快有曠世之作喺大銀幕面世喇！
http://www.youtube.com/watch?v=gUpUyUMBFTY