【本報訊】上環西消防街七人車墮海意外中，一對好市民「救人孖寶」阿彭同阿梁，一個即時報警一個跑到百米外的消防局求助，令自行脫險的司機能瞬即獲得救援減輕傷勢。原來阿彭及阿梁因工作關係，在現場一帶岸邊「打躉」十多二十年，曾分別及合作拯救過多名意外或跳海自殺人士，可說是救人經驗豐富。
「去年8月16日救人情況同今次一樣，當時一個雙程證女人同丈夫因感情問題爭執後，喺碼頭邊跳海自殺。個丈夫跟住跳海救老婆，兩個人喺海中浮沉，一個釣魚阿伯掟個泥鯭籠畀佢哋拉住，阿梁報警我跑去附近消防局搵消防員救人，同今次一模一樣啊！」阿彭表示救人義不容辭，下次遇上都會繼續盡力救人。
阿梁對今次再次成功協助救人，感到十分興奮說：「我見架車沉落去時都想過跳海救人，但當時啲浪好大好急，我怕有危險所以冇落水，對於個司機能成功脫險，感覺得好開心啊！」