救生員：難以兼顧
港九拯溺員工會副主席郭紹傑
「救生員需要專注拯溺工作，如果睇到有人喺水上食煙，就要落水勸佢，會分散自己注意力；而更衣室同燒烤場等場地，我哋一向較少留意，要兼顧埋就會增加工作量。我擔心條例草案對海灘吸煙區劃分模糊，好似沙灘上唔可以食，但係石屎路又可以食，執行起上嚟容易引起救生員同泳客之間爭執，你一行埋去叫人唔好食煙，就好容易惹埋成班人嚟，少不免會引起麻煩。」
前線警察：增工作量
香港警察隊員佐級協會主席鍾錦華
「我擔心如果執法工作指引同職權範圍唔清晰，市民可能一見到有人違例食煙就打三條九，阻礙緊急服務。現時警方巡邏時發現有人違例吸煙，會先口頭勸喻，無效先會發出傳票；因為捉違例吸煙並非警方首要工作，警方主動檢控嘅個案好少。捉到嘅唔係一定係蠱惑仔，乜人都有。明年一月新例實施後，全港多咗好多地方禁煙，初期違例者會較多，如果場地管理人勸喻無效，動輒召警求助，會增加警方工作量。」