香港最大地產發展商──新鴻基地產（016）舊年賺大錢，純利升一成，一班高層齊齊加人工。郭氏三兄弟當中，以大佬郭炳湘加幅最高，加咗7.5%，至於老二郭炳江同細佬郭炳聯，就加7.4%同7.3%，相差唔遠，不過唔好單睇加幅，睇埋三兄弟實際收幾多，你就會發現過癮嘢。排最尾嘅郭炳聯人工最高，攞成206萬元，至於大佬就收200萬元，最少係二佬郭炳江，得189萬元，加咗都唔夠細佬未加咁多。
幾兄弟除咗自己加人工，對德高望重嘅世伯──恒基地產（012）主席李兆基亦非常慷慨，四叔酬金由5萬加到11萬，加咗1倍有多。不過，講到人工高，就點都唔夠黃植榮，酬金由去年嘅1229萬元，加到今年1263萬元，打工仔年薪過百萬已經好巴閉，佢老兄月薪都過百萬，真唔講得笑。論加幅，就要數到獨立非執行董事王于漸，加咗成4倍人工，由4萬加至21萬元。
做新地董事真幸福，個個都有人工加，但做股東嘅就冇咁嘅福份，皆因今年新地純利雖然升咗，但就冇增派股息。上個月，郭氏兄弟公布業績時，攞最少人工嘅郭炳江話，未來要喺中、港兩地投資多個物業，要好多資金，所以唔增派股息喎！