樓市唔好，網上流通嘅負面訊息就特別多，雖然大部份詛咒當分析，不過亦有唔少係可堪細味，尤其講相關行業嘅題目，點都實際過睇班吹水大師嘅酸葡萄理論。《Uwants討論區》內，NIGHTDOG以「香港建築行業前景」為題，搞咗個投票，由7月開始到10月初，總共有117個網友投票，95個話冇信心，有信心嘅只有12個，表示一般──即係冇意見嘅有10個，結果令人沮喪。
至於投完票講番幾句嘅，幾乎清一色末世教徒口吻，好似yrvkwl話齋：「一句講完，夕陽行業，朝不保夕…香港建造工人大概有16萬，再加幾萬管理人員，行內根本冇足夠職位容納。
很多50幾歲已很難找工作，轉行又難，退休又太早，真是老來折墮。香港建造業總工會應該為行內人士提供協助，要切實向政府施壓，創造職位。土木工程能促進社會、經濟繁榮，人民才能安居樂業。我們所付出的辛勞只換來短暫的工作及不穩定的生活。有誰共鳴！」
另一工友兼網友11741174就自數行業興衰：「之前幾年8點開工，10點3飲茶，12點食飯，開工做到3點半飲茶，5點半收工，日薪1000…𠵱家8點開工，做到12點食飯，跟住3點半飲茶，再做到6點，日薪650，你話冇咗幾多，仲要成日冇工開，我想問有邊行喺呢兩年減人工減得咁勁呀？」
執定包袱上大陸
近年就算有新地盤開工，多得輸入外勞政策，本地工人工資係咁瀉，樓價同生活指數不斷升，相反一海之隔嘅澳門，三行工人愈嚟愈好搵，唔少香港冇工開嘅都過大海搵食。咁落去，會唔會好似同一班過去十年八年返大陸搵食嘅人一樣呢？
網友tototon話：「大陸嘅發展遲早追上香港，風水輪流轉，大家準備包袱偷渡返大陸啦…本人做建築模型，跟公司幾年前搬上大陸，唉，真不適應大陸的環境，但眼見內地人愈來愈富，愈貴的樓盤愈多人買，再過幾年不知香港變成點。」