Evon好勤力，佢喺「OurWonderland」負責沖咖啡同整甜品，遲吓仲要學埋整Cocktail。「我好有心機學沖咖啡，初初學真係幾辛苦，成個晏晝係咁飲，真係飲到屙。」咁慘，有無客讚你手勢先？「都有㗎，有對情侶，兩個都好鍾意飲咖啡，每次嚟幫襯都要我介紹新口味咖啡。有一次我去泰國旅行，餐廳叫咗個新人沖嘢飲，可能佢新唔夠經驗，我返到嚟個男仔同我講：『下次都係你沖番啦。』聽到嗰陣都幾開心，有人認同嘛。」
我少飲咖啡，以為沖咖啡頂多要試多幾次味，試啱味就可以一勞永逸，問番先知原來有唔少學問：「味道固然緊要，但咖啡泡都好考功夫。」乜泡咁巴閉呀？「無氣泡，要打出一層白色好似棉花咁先為之最好，泡嘅密度要高，咁先可以喺上面畫圖案。」咁邊隻咖啡最難搞？「熱Mocha最難，因為Mocha本身應該帶少少苦味，但客人會Expect好似朱古力咁甜甜哋，我要逐羮逐羮朱古力粉咁慢慢試味㗎。」沖杯咖啡都要搞咁多花臣，呢啲咪有Heart囉。
記者：蘇振鵬
攝影：楊錦文
煙肉木瓜卷每串$18
煙肉捲住木瓜串燒，香得嚟唔油膩，更勝串車厘茄，食嗰陣記得點檸檬汁，酸酸甜甜好開胃。
OwlMocha$68
呢杯入口Creamy似奶昔，仲加入咗Wisky同Malibu兩隻酒，入口帶陣陣酒香。
食客評分（10分滿分）
OurWonderland（23122213）
地址：尖沙嘴金馬倫道5號太興廣場5樓