四名親政府陣營人士上星期五倒戈，口話支持民建聯陳鑑林，但實質竟然投票畀卿姐做財委會主席，事件令到政府都好關注。倒戈嫌疑犯之一嘅泛聯盟劉秀成透露，日前見到政制事務局局長林瑞麟，對方都叫佢哋喺委員會選主席問題上唔好搞咁多事，要和諧啲合作；可能係咁，劉教授始終唔肯講投票意向，佢仲話會去參選規劃panel嘅主席，挑戰自由黨劉皇發，擺明同自己友爭位啫；最怕到時民建聯唔畀票佢，佢就喊都無謂。
醫學界立法會議員郭家麒噚日同傳媒茶敍時都話，嚟緊嘅規劃panel主席，係發叔同泛聯盟劉秀成之爭，劉秀成好似志在必得，因為已經有泛聯盟嘅支持。郭家麒仲話，近日已經收到拉票電話，但就唔肯透露佢會投邊個，只係話可能會好似財會咁，會有surprise都唔定。