臨近年尾，兩大新世代遊戲機PS3同Wii相繼登場，微軟XB360雖已推出一年，不過僅能在歐美站穩陣腳，亞洲區銷量始終難以突破，日本更是慘敗收場。要面對兩大對手將出現嘅瘋狂宣傳攻勢，微軟將Killer級遊戲《Halo3》留做壓軸王牌，改打「日本章法」，以坂口博信×鳥山明瞓身作《藍龍》應戰，仲推出初回限定同梱版XB360，包含一部XB360（附有線手掣）、一隻《藍龍》遊戲、角色Figure（五款之一），最吸引係附送《藍龍》主題面板，啪落部XB360度當堂型爆，真係望住佢儲Level都特別起勁！初回同梱版XB360定於12月7日在日本發售，價錢約港幣$1,948，定價合理，不過數量有限，到港水貨肯定又再炒起，目標價$2,500已算抵玩。
坦白講，《藍龍》喺亞洲尤其喺中港台機迷心目中，絕對夠晒份量，日式RPG比美式部隊戰《Halo3》實在吸引太多！睇嚟今年三大廠均會出盡飲奶之力，鬥搶市場，大家食住花生等睇好戲喇。
記者：徐影龍