噚日隻金寶通（320）首日掛牌，公司細細，業務冇乜特別，但有好多富豪第二同埋第三代撐場，好以已故新加坡超級富豪邱德拔個乖孫邱堅煒、美心食品有限公司董事總經理伍偉國，同埋恒生銀行（011）元老利國偉博士外甥陸觀豪，都畀面嚟食燒豬。
除咗呢班富豪之後，一年起碼做成過百次companyvisit嘅惠理基金投資總監謝清海，都特登抽空嚟到飲番杯香檳！佢間貴寶號係金寶通上市前，買咗唔夠5個巴仙嘅金寶通股份，而金寶通喺首日掛牌都爭爭氣氣，埋單升咗成14個巴仙，都飲得杯落矣！
講番好耐無蒲頭嘅陸觀豪，佢最新嘅發展係出任金寶通嘅獨立非執行董事，原本華華噚日朝想問吓佢𠵱家喺邊度發財，但係佢食完燒肉就急急腳走人，真係捉都捉唔住，惟有等下次再傾啦！