中國人係區內賭業主要客戶來源之一，澳門賭權開放後，賭業搞得有聲有色，加上地理位置上有絕對優勢，究竟身處柬埔寨首都金邊嘅金界控股（3918）憑乜嘢吸引投資者注意呢？
據有關人士解釋，專業賭客「賭錢」至上，唔會介意周遊列國光顧不同地方嘅賭場，同時，金界對賭團客仔照顧周到，只要5000美元最低入場費參加賭團，就可以享受3日3夜賭場及酒店免費食宿，呢類賭團客平均會帶15000至20000美元入場，過去5個月賭團收入佔大約50%，比例唔細。當然，賭團經紀佣金都會高啲。
中糧國際（506）以前叫做中國食品，01年5月改名，前控股母公司係鵬利國際，03年5月被中糧總公司私有化，「冧把」268則被𠵱家嘅軟件商金蝶用咗，估唔到5年後嘅今日，中糧國際又用番中國食品呢個名。
根據今次大重組，日後中國食品會集中做可樂及其他飲品生意，糧油業務就由新嘅「中糧國際」去做，其實中國食品叫「中國飲品」更加貼切。今年上半年飲品業務佔集團純利37%。
由於呢單交易實在太複雜，要評估公司最新價值唔容易，噚日股價急升13%，最高見6.35元，咁大單日升幅係咪已經反映利好因素，要睇呢幾日大行嘅報告，相信條數都幾㩒計。
歐陽風