今周中只有周二及周三兩日有波玩，周二仲只係得1場友賽，所以今次「2線波早飛」都係向周三賽事埋手。
頭場安道爾主場對馬其頓，客軍啱啱作客迫和英格蘭，安道爾亦於上周末作客，被克羅地亞請食7隻光蛋。擺到明安道爾實在係E組魚腩，以馬其頓對英軍嘅表現，作客續向安道爾派至少1隻光蛋應冇難度，「客勝」可期。
講開今屆歐國外魚腩，哈薩克及塞浦路斯兩支賽前亦被睇死做魚腩部隊，屢有驚喜，塞浦路斯就啱啱大炒愛爾蘭；而哈薩克早前亦打和比利時，上周末主場對波蘭，都要去到下半場先僅負1粒，今主場迎頹勢的芬蘭料不敗。
英倫三島球隊近期只有蘇格蘭對辦，北愛爾蘭就維持對強隊偶有佳作，但對弱旅就踢唔出水準。今輪北愛主場鬥實力平平嘅拉脫維亞，相信無乜條件話穩贏；而拉脫維亞亦擅長穩守突擊，呢場外圍賽和味濃。
主辦國對碰撐瑞士
國際友賽，奧地利同瑞士兩支歐國盃主辦國，因唔使打外圍賽，今輪終正面對碰。但睇奧地利近期成績認真麻麻，上周五對住弱旅列支敦士登，都只係小勝2:1；相反瑞士對辦得多，今場實行先向呢個合辦對手嚟一個下馬威。文：華度