上周六國際賽日戰果暴冷暴熱，英格蘭、法國、荷蘭呢啲孭飛球隊全部贏唔到，不過一向做開「超級魚腩」嘅聖馬力諾、安道爾等繼續被大炒；星期三繼續取易不取難，追捧另一支魚腩、地中海島國馬爾他（馬會譯名）嘅對家。文：牽牛
數一數贏唔到嘅強隊，英格蘭、丹麥及荷蘭只能和波，法國、愛爾蘭更加輸埋，係咪代表歐洲整體足球水準接近咗呢？咁又只係講啱一半，一貫魚腩代表始終冇咩起色，魚腩之王聖馬力諾，又輸7蛋畀捷克，足智彩首次開個捷克[-5]，結果都係開「主勝」，連埋熱到爆嘅主其他波膽開出，單計呢一場波馬會一定損手。
馬爾他球員不見經傳
地中海島國馬爾他，唔知係唔係球員食得海鮮多，已經係另一支歐洲魚腩表表者；人口約有37萬嘅馬爾他，世界排名只得144位，歐國盃外圍賽喺C組，已經兩戰全輸，仲要失足7球，咁嘅防守力點信得過。而且馬爾他球員大部份都喺國內效力，最叻嗰個係前鋒米蘇特，𠵱家打緊挪超利尼史特朗，挪超係咩水平，大家心照啦。
今次作客馬爾他嘅匈牙利，本身都唔係特別好，上周六主場先輸畀土耳其0:1；不過近況唔好飛數仍然側埋一邊，𠵱家客勝得1.18倍，以佢哋中前場攻擊力，西布朗嘅謝拉、漢諾威嘅侯斯廸、哈化柏林嘅戴達，級數都有番咁上下，睇番匈牙利上次作客贏波斯尼亞3:1，今次贏波絕對唔出奇，不過熱W玩嚟無咩用，不如博客隊上半場已經贏波到尾，1.5倍客/客捧得過。而且匈牙利有水晶宮門將基拿利把守最後一關，後防都可靠，一於博客軍今仗唔失波，博贏3:0、4:0波膽。
冷敲「兩蘭」和波
同日冷門推介，就係蘇格蘭作客迫和烏克蘭；蘇格蘭上仗打低法國，過程雖然有啲幸運，不過中後場班後生仔真係打得唔錯，夠晒爛打，有番以前蘇格蘭打不死精神。蘇格蘭3戰已經有9分在手，今場都一定望1分，咁出線就大有機會。烏克蘭前鋒舒夫真高仍未退燒，未必復出，而且就算舒夫真高真係復出，佢喺英超表現麻麻，蘇格蘭呢班英超兵又點會怕佢，而且球迷都唔好受烏克蘭打入世盃8強嘅成績而憧憬，一支2線球隊突然取得佳績，通常緊接大賽都好難保持，今仗一於博烏克蘭主場和波再失分啦。
投資特攻隊金句
馬爾他球員大部份都喺國內效力，最叻嗰個係前鋒米蘇特，𠵱家打緊挪超利尼史特朗，挪超係咩水平，大家心照啦。