曾經係電訊界數大美人之一陳碧鏵（Prudence）又轉工嘞！噚日，八達通宣布，佢哋嘅CEO戴勇牧，決定11月18日約滿之後唔續約byebye，而Prudence姐就會走馬上任坐佢個位，11月1日到八達通報到，19號先正式上任，皆因佢個任命係要經金管局批准。
Prudence姐𠵱家係VISA國際組織香港及澳門區總經理，2002年加入之前，分別喺數碼通、老電（即係𠵱家隻8號仔），同埋香港通訊國際控股做過Marketing高層，咪當佢花樽，查實佢不知幾勤力幾做得，好似喺VISA出親新卡實會見到佢，出鏡率多過啲「星」，而事實上亦做到有成績！至於Prudence喺Visa嘅香港及澳門地區總經理職位，就由JimDixon接任。