國泰港龍二合為一，但要講親密程度，點都及唔上呢對陳家兩生花。家姐陳雅琪每日着住套火紅嘅國泰空姐制服返工，細妹陳雅雯就一身紫色港龍空姐套裝周圍飛，兩位小姐嘅年齡只係相差7分鐘，係名副其實嘅孖生姊妹。
呢對兩生花於是成為國泰港龍合併後嘅生招牌，理所當然做咗最新一期《國泰天地》封面人物。路邊社消息指，家姐陳雅琪最近喺國泰60周年嘅「飛躍雲裳」制服騷出現，同人傾偈時講開自己有個孖生細妹做港龍空姐，國泰企業傳訊部即刻靈機一觸搞咗個兩生花封面故事。
不過，今次合併有人歡喜有人愁，大家唔好忘記港龍有191人因此無咗份工。雖然國泰CEO陳南祿今次喺致員工信用「極為艱難的決定」去形容裁員，但相信點都無辦法撫平呢班無啦啦變咗失業大軍嘅人的傷口。真係同人唔同命。