西九龍文娛藝術區呢壇棘手嘢，由有冇天幕、係咪單一招標、再拗到究竟有乜文化設施，到𠵱家足足拖咗都有幾年，但係至今都仲未有最終發展嘅方案，你話關心西九嘅人係咪好勞氣呢。
不過，據聞政府已經拍板，最快明年初推出具體方案，唔會任由計劃無了期不了了之。泛聯盟劉秀成就引述政府消息話，報告明年初會起到，而且擔任西九龍文娛藝術設施諮詢委員會主席嘅政務司司長許仕仁，仲informally話過最終定案會參考立法會小組嘅建議㖭，好似好肯聽立法會意見咁噃。
梗係啦，如果最終個方案仲係走晒樣，連立法會意見都唔聽，咪一樣過唔到立法會嗰關。煲呔連任在即，會唔會咁蠢辣㷫各大黨派吖？睇嚟西九呢次翻身有望喇。