左丁山在十月五日寫「投訴潮流」，竟然有讀者反應，一啲同意，一啲認為有時唔投訴唔得，讀者自稱XYZ嘅講到佢有一位朋友為咗自我增值，到一間大學嘅公開課程上堂學品嘗紅酒，點知課程有部份由酒商主持，教完書就推銷紅酒，推介產品，講埋價錢提供折扣㖭。左丁山睇完電郵，覺得呢位酒商好醒目，識得與大學合辦課程，乘機賣貨，代價可能係佢地唔收講課薪酬，實際就除笨有精。大學呢？除精有笨噃，畀學生在背後彈唱，聲譽受損。學生點解唔在堂上抗議呢？騎騎，讀公開課程，一為了興趣，二為了一張沙紙，香港人精甩辮，萬一得罪老師，肥佬咗點算？間接話畀左丁山聽仲好過。
講到投訴，左丁山睇上期《東周刊》封面故事講李慧玲懷疑因為飲醉酒，以「唔舒服」為理由，冇主持當日嘅商台節目。呢啲事好罕見，但假若真係發生咗，就係商台與轄下節目主持人嘅事，商台內部如何處理，自有佢嘅理由，關我哋乜嘢事吖。當今香港，好多事情不以市場原則為依歸，而係以話事人旨意為指標，外人好難猜測嘅。
左丁山平時好少聽李慧玲節目，有時在的士上聽到，冇乜特別感覺。《東周刊》報道話居然有聽眾「質疑利用大氣電波的電台，主持人不自律失場，有損公眾利益之嫌，考慮向廣管局投訴。」左丁山睇完，幾乎笑到碌地，李慧玲唔做節目，有損公眾利益？Comeon，講笑搵第二樣！如果廣管局接受投訴，唔該班官員辭職。
左投訴、右投訴，人人有投訴自由，只是苦了接受投訴嘅機構，其中一個係消費者委員會。太多人唔知道去邊度投訴，一諗起就打電話去消委會，搞到消委會成日電話唔通，消委會唔係有權處理所有投訴嘅，但係請投訴者另外打電話，佢哋都俾投訴者鬧埋一份！