雷丁今季成為英超生力軍，積極進攻嘅風格吸引唔少球迷，都想買番件佢嘅波衫支持下。不過雷丁同上季韋根嘅情況相反，本地不論代理定樓上波衫舖都冇翻貨，想買雷丁球衣就要諗下計。
好在雷丁官方網都有提供網上訂波衫，不論今季嘅主場藍白橫間，定作客嘅紅色球衣都有，定價亦唔係太貴，中童或女裝要28鎊（約420港元），男裝就要38鎊（約560港元），𠵱家秋風起，仲有長衫主場球衣出售，就要40鎊（約590港元）。
不過上網買嘢始終麻煩啲，球迷先要登記，成為雷丁會員，不過唔使錢，另外每件球衣另加10鎊運費；係就係貴啲，不過勝在物以罕為貴，起碼出街唔會成日「撞衫」。
訂購網站： http://www.readingfc.premiumtv.co.uk
貨品價格：28至38鎊（415港元至563港元）