俄羅斯自從由荷蘭籍教練軒廸克於世界盃後領軍，至今連場比賽都只能同對手開出入球「細」戰果。諗真啲其實都算正路，一個好嘅教頭，上任後首先做嘅，的確係先執好球隊防務，就算唔識入波，同對方踢成0:0都叫做不敗吖！俄羅斯迄今喺E組分組賽兩戰俱和，今輪繼續主場出擊，對住實力較次嘅愛沙尼亞，相信又可以添多場不失球紀錄，可向該隊淨贏2:0波膽埋手。
烏、蘇戰和氣生財
都可算「死亡之組」嘅B組，暫時竟然由蘇格蘭以3戰全勝獨大；照睇呢支長期位列2線嘅球隊，個勢就嚟會斷一斷。今輪作客烏克蘭，實在唔易打，一嚟要去到東歐，二嚟烏克蘭可望有番病癒嘅舒夫真高壓陣，各位不妨喺呢場博吓和波，甚至用「半全場」「和/和」出擊。
G組魚腩盧森堡今輪主場迎戰保加利亞，盧森堡此前已進行過1場主場賽事，算係「爆冷」咁僅以0:1輸畀荷蘭。如果覺得保加利亞實力不在荷蘭之下，就更加值得喺今場向保軍大捷戰果埋手。英格蘭當日主場對住安道爾淨贏5:0，都唔及克羅地亞上周末大勝7:0咁架勢；𠵱家啲1線球隊好似都未必咁認真同你班上盤客大勝弱旅，反而嗰啲2線球隊就會有份要取得大捷投入感，保加利亞呢場開「客其他」波膽啱feel。
北、拉擅守博「1對0」
最後係博北愛爾蘭主場打和拉脫維亞0:0，事實上兩軍都唔係攻字掛帥，最叻死守保持不失，呢場就算北愛有主場之利，相信都未必會進取，兩軍隨時悶和到完場。文：華度