意大利「惡狗」馬特拉斯，之前終於爆響口，講番佢同施丹喺決賽嘅對話，大家都以為「世紀一頂」事件應告一段落；點知，我求大俠收到可靠線報，「惡狗」由夏天開始，由練習場到球場都拎支筆扮才子……原來！「惡狗」就出書喇！
收益撥捐慈善用途
「惡狗」外形粗獷，但充滿生意頭腦，同上代「球王」施丹「過招」後，即刻嗱嗱臨揸筆，食住條水出書，而由佢親自撰寫《我對施丹到底說了甚麼》，就即將面世，認真貼題喎！據知，《我》一書目的唔係揭露事件真相咁簡單，而係懶係搞笑咁寫出「惡狗」嗰晚，有可能對施丹講嘅249種對話，例如「施丹，場波都未輸，你點解咁快無晒頭髮」之類。
《我》呢本書野心唔細，唔止喺意大利出，仲直指國際市場，相信好快香港都有呢本書賣，暫時定價就係10歐元（約100港元），全部都係作為慈善用途，睇唔出「惡狗」咁善良哩？
意大利球星有鋪出書癮，「惡狗」唔係第1個，之前就有「羅馬王子」托廸，佢曾經出過本笑話集，仲鬼死咁受歡迎，笑到同胞個個碌地；之但係呢壇嘢有啲唔同，明明決賽嗰晚兩個大男人講咗幾句嘢啫，都可以啓發到「惡狗」出一本書，聽到都覺得頂癮！
「嗱，呢啲咪叫『創意』咯！求大俠對馬特拉斯嘅慈善心就略有所聞，但估唔到佢幾有諗頭，自認創意十足嘅香港人應該學吓喇！」