以集資金額計算，人類歷史上最大型嘅集資活動──中國工商銀行嘅招股噚日正式開波。工行喺四季酒店搞咗個投資者推介會，之前放晒風聲話會有好多大孖沙嚟，結果只得四叔派咗恒基地產（012）執行董事兼首席財務總監歐肇基同埋長實葉德銓出席，彤叔同李超人影都冇！
市場鍾意將建行同工行比，舊年建行搞投資者推介會，彤叔及嘉里集團大股東郭鶴年都有親自出席；恒地林高演、長實葉德銓亦到場，今次好似冷清咗少少。
不過，好彩工行都有東亞銀行主席李國寶，帶埋兩個寶貝仔Adrian同Brian嚟撐場，若果唔係，以為只係一間普通公司嘅推介會㖭！據講由於今次工行上市係由幾家大行負責，所以要有邀請函先入得推介會，華華見唔少基金經理食閉門羮；參與推介會人數約有500多人！
呢次嘅集資活動仲有一個特點，就係公關公司居然唔畀記者同參加推介會嘅投資者傾偈！華華明白，上市前係唔可以講啲有關上市嘅敏感資料，但係噚日大家都好合作，搞到咁又何必呢？華華希望唔會有下次啦！