個人對各地聯賽嘅投注態度偏差不大，除英國波因情意結特別偏愛外，其餘贏到錢便是好嘅聯賽；所以對冇路捉嘅國際賽興趣不大，但對巴甲日職嘅投注意欲絕對會勝過經常開和、賭讓球盤難度大但贏面不高嘅意甲。
澳彩資訊贏成條街
好多人對巴甲日職嘅投注情有獨鍾，無他嘅，時間有獨特優勢，大家可以在該時段全程掌握比賽形勢；所以波友對呢類冷門波嘅資訊亦相當渴求，喺呢方面，相信好多人都會認同「澳彩」絕對勝過一季逾300億港元投注嘅「足智彩」。
馬會大員經常對外強調，要讓其他媒體有生存空間或者準確性關係，所以部份資訊不會詳細列明，例如即場比數、陣容及賽前新聞，多數欠奉；相反彼邦嘅澳彩，雖有愈玩愈縮之感（現時有逾3、4成賽事因強弱懸殊風險大，而不再開最受歡迎嘅亞洲盤），但人家網站對資訊報道嘅詳盡性，絕對可稱得中文賭波網中嘅大哥。
以巴甲日職為例，澳彩有詳盡嘅賽前新聞報道、對賽陣容中，傷、停或因踢國際賽而不能上陣的球員名單一一列明；而日職更在賽前1小時公布陣容；相反以剛過去周六、日的巴甲賽事為例，足智彩只提供一篇約800字嘅賽前新聞報道當中兩場重要比賽，其他波只係提供對賽往績呢類最簡單不過嘅資訊，還望馬會候任CEO應家柏先生明年初上場「騷哥利」。文：蘋果波神