花旗國仲有幾個禮拜大選，日本總理啱啱上台，祖國就舉行六中全會，就喺呢一刻，北朝鮮嘅金正日同志試爆核彈。究竟為乜？今日，孫柏文就想同大家用一個比較「天方夜譚」、甚至「天真無邪、非常樂觀」嘅角度，去分析呢次點解金同志要玩核試。不過今次分析，首先要做個假設。
假設金正日唔係一個狂人、瘋子，心知肚明就算擁有全球最有戰鬥力嘅軍隊，如果經濟一直繼續搞唔起，北朝鮮遲早會枯死，政權亦「不過三代」。大家都應該記得，金正日早排成日耐唔耐就「神州遊」，去嘅地方有南巡過廣州，入住最代表祖國第一代「改革開放、引入外資」嘅白天鵝賓館。所以，可以「天方夜譚」咁假設，金正日好想學我哋祖國偉大鄧小平同志，幫北朝鮮搞「開放改革」。
早執免死金牌唔敢用
不過，正當一個政權非常穩定嘅原因係因為佢哋「封關鎖國」，完全同外間隔絕，國家一開放，政權分分鐘會倒台。而喺近二十年歷史裏面，每一次有穩定嘅政權，因為國家開放而忽然倒台，大家都可以見到該國嘅「造反派」，都會有「外國勢力」介入、支持。所以，好似北朝鮮共產黨，呢啲完全沒有反對派嘅政權，就會好驚將國家開放。
今次核爆，北朝鮮其實只係想加入「擁核俱樂部」nuclearclub，因為自從上個世紀四十年代，人類引爆第一枚核彈之後，未試過有一個「擁核」國被外敵入侵、佔領。今次北朝鮮成功研製呢個國際外交「免死金牌」，就可以唔需要再擔心推行改革開放嘅時候，被人入侵。
呢條「一有核彈、能推改革、可保政權」嘅算式，金正日可能一早已經領略得到，不過唔可以推行，因為金正日知道北朝鮮一玩核爆，花旗國就會「誅死」被視為「北朝鮮大佬」嘅祖國政府，到時祖國就會好麻煩。所以，早前祖國領導人同金正日就來咗次「苦肉計」，祖國以「反恐」為名，叫澳門特區政府做嘢，「凍結」北朝鮮擺喺「滙業銀行」嘅2400萬美元。
祖國北朝鮮扯貓尾
啲美元一被凍結，金正日就可以扮到冇錢買「法蘭西拔蘭地」，「發窮惡」、「同兄弟反面」，北朝鮮就可以好大條道理咁「失控」，試爆核彈，繼而落實「一有核彈、能推改革、可保政權」嘅算式。不過，今次核爆，花旗國牛仔總統都好着數，因為每一次花旗傳媒焦點放喺「國家安全」議題上面，共和黨嘅支持率就會升，今次核爆，就令到花旗國人注視「國家安全」，而唔係早幾日嘅「同性戀性醜聞」。
最後，唔知道今日為大家提供嘅「天真無邪、非常樂觀」分析，究竟有幾準，不過，為了東亞和平，為北朝鮮人民啲日子可以好過啲，我好希望我冇錯。