八方噚日瞓醒，見天色一改近日嘅風和日麗，陰陰沉沉咁，已經凝住會有啲唔好嘅嘢會發生。果然，北韓核試，仲搞到股市一度大跌。但原來有人仲犀利，法新社上星期五有篇報道，已經引述香港玄學家楊天命嘅預測，話算到北韓會喺上星期六至11月4號期間核試。
當然，北韓一早已經爆響口話計劃核試，俾人噏中個時間都唔算好出奇。但八方本住八卦精神，都打電話畀楊師傅問個究竟。楊師傅懶淡然咁話：「係呀，我估中咗，其實我以前都估中好多嘢啦。」根據佢舊年去西藏布達拉宮用《易經》占卜嘅卦象，除咗一早預測到核試呢單嘢，仲估到今年會有個女人（陳太）出嚟挑戰政府，同埋早排嘅六月飛霜（落雹）。
八方心繫家國，愛國愛港，即刻打蛇隨棍上，問楊師傅咁香港出年會點？點知楊師傅嘅預測仲驚人，佢居然話出年嘅特首選舉，煲呔會宣布退選！不過，佢進一步解釋，話其實呢招係以退為進，到時有人會向個別嘅周刊或傳媒放出呢個煲呔考慮退選嘅消息，實情係有人跳草裙舞而已。楊天命話，煲呔行運行到09年，可以話做硬特首，而且唔會好似阿董咁要提早落台。
選委會選舉爭崩頭
佢又補充話，特首選舉煲呔應該有一至兩個對手，其中一個係嚟自金融界或商界嘅手下。咁唔通係唐唐？但睇個勢又唔似喎，八方惟有用句廢話嚟總結：咁就真係要拭目以待喇。不過，八方大膽建議，既然楊師傅對國際大事同香港政局都咁有見解，煲呔不妨考慮招納楊師傅入智經基金做佢智囊，同陳德霖、黎慶寧一齊，為佢出謀獻策。
其實八方都有啲慧根，因此亦學楊師傅咁喺度做個預測：就係選委會選舉今年肯定爭崩頭。八方唔係導人迷信，而係得知選委會選舉噚日開始派提名表，雖然提名期到11月初先截止，但啲專業界好踴躍，好似抽新股咁每個人都攞成叠表走，有時仲要排隊，驚死遲啲冇得攞咁。
有專業界話，啲人搶得咁狼，其中一個原因係，有好多專業界目前仲係游離緊，所以民主派同曾蔭權陣營都想快刀斬亂麻，趁早攞提名表，然後畀佢哋簽名支持，及早箍住啲票，等佢哋冇得反悔，費事夜長夢多。