據講3G電話在香港未算十分流行，用家以年輕人為多，但3G明顯係未來潮流，始終會完全代替2G嘅。
肥仔K返嚟香港過中秋，隨身攜帶一部紅色日本「軟庫」（前稱日本Vodafone，已被軟庫收購）3G手機，十分搶鏡。據肥仔K講，喺東京用3G，年輕人不能一日無之，最主要用途唔係打電話或送出短訊，而係搵資料，玩遊戲。日本火車地鐵唔准講電話，以免騷擾他人（如果香港地鐵公司，九廣鐵路膽敢推行如此措施，左丁山願三呼萬歲），故此日本盛行在火車上玩短訊，用2G手機一樣掂。但係，3G手機可以提供巴士路線、地鐵轉駁法、航機快訊、機場火車班次等等資料、拉麵店位置，幾乎乜都有。
某月某日左丁山在東京街頭與肥仔K商量搭地鐵好呢還是搭巴士，肥仔K在3G手機上㩒兩㩒，就話：「巴士去新宿方向，兩分鐘到呢個站，不如等巴士！」嘩，方便到暈，跟住佢又用3G手機查到：「京成快車第二十七號特急於下午兩點自上野開出，三點到達成田機場。」佢話3G用寬頻上網，日本發展出大量專為3G手機而設嘅網站，在東京市內上網，十分容易。最麻煩嘅就係日本人自用一個特別系統，與美國歐洲標準唔同，我哋嘅手機去到日本冇晒用，日本手機出到嚟，亦等同廢物，好多美國投資銀行家每分每秒睇住部BlackBerry，一去到日本就斷咗線，慘過冇得「追龍」。最近有消息話，「黑莓」之製造商RIM為日本市場攻關，令「黑莓」軟件可以在日本應用，如果真係得嘅話，黑莓在手，全球通行，橫掃其他競爭對手咯。
左丁山自從在的士遺失一部3G之後，好耐未用過3G手機。唔知香港現在嘅3G科技進展成點，南韓人用手機上網、訂位、購物、查資料，視作等閒，香港好似仍然未十分普及，以香港人咁聰明靈活，點解仍未度掂呢？唔通因為市場太細？