西班牙前晚喺歐國盃外圍賽F組分組賽，作客輸畀瑞典0:2，15年嚟首次喺外圍賽連輸兩場。雖則佢哋教練阿拉干尼斯俾國內傳媒插到飛起，但佢堅持唔遞信封，仲連西班牙足總都撐佢。點解會咁？之唔係同錢有關囉。
炒魷要賠近6,000萬
西班牙喺今屆歐國盃外圍賽嘅表現差到你唔信，之前試過爆大冷作客輸畀弱隊北愛爾蘭2:3。連同前晚場敗仗，佢哋頭3仗錄得1勝2負，所以西班牙傳媒好似《馬卡報》同《阿斯報》咁，以及好多球迷，亦要求教練阿拉干尼斯自己辭職或者西班牙足總炒佢魷魚。
不過，我求大俠收到風，西班牙足總都想郁阿拉干尼斯，只不過係落唔到手，皆因阿拉干尼斯同西班牙足總份合約仲有成20個月先屆滿，佢話明要佢自己走都得，不過就要賠足畀佢同佢啲助手，少個仙都冇得傾，聽講條數高達600萬歐元（約5,900萬港元），西班牙足總唔似英格蘭足總咁有幾條大水喉射住，根本就冇錢賠，惟有揸頸就命啦！
雖則西班牙問題多多，好彩佢嗰組唔算難打，攔路虎得瑞典同埋丹麥，入決賽周應該唔係大問題。
「阿拉干尼斯佢出晒名厚顏，之前俾傳媒踢爆公然鬧阿仙奴嘅法國國腳前鋒亨利係『死黑鬼』，事後係咁講句『對唔住』就當乜事都冇發生過，所以西班牙人想佢乖乖哋咁走人，除非有奇迹啦！」