早排低調娶新抱嘅機管局主席、利豐老闆馮國經，呢排真係人逢喜事有艷福。噚日佢為新引入嘅英國便服品牌TedBaker響尖沙嘴主持開幕禮，一身西裝骨骨趕到。設計師TedBaker同場為佢80歲媽咪慶祝生日，馮國經陪住齊齊切蛋糕，點知Baker老太太好鬼熱情，切完餅即時錫咗馮國經一啖，之後未夠喉，又再錫多啖，馮太見到會唔會呷醋就唔知喇。
八方問馮國經點解位公子結婚咁低調，公關就即時代為推搪，之後馮生就同八方傾咗兩句閒偈，佢自認着衫保守，話：「香港人着衫好國際化，好多新嘢都敢試，不過我自己衣着打扮就保守啲，多數西裝為主。」唔知佢會唔會參考吓煲呔呼籲，以後少啲打呔，輕裝上陣？