英母校勸捐　出拖字訣
馮仁昭四圍超：Eason「我呢排手緊」

奧比斯光明大使陳奕迅（Eason），噚日喺馬鞍山出席該會活動，早排佢去印度探訪幫個會籌咗200萬。佢愈嚟愈成熟，都覺得做咗爸爸之後更熱心關注社會。Eason透露佢喺英國讀嘅中學，早前聯絡佢，搵佢捐錢，佢話：「我想學Kelly（陳慧琳）搞個教育基金，之前我喺英國讀過嗰間中學搵我，佢哋想發展音樂科技嘢，所以想我捐幾十萬港幣，仲會改名為EasonChanMusicSchool。」

錫住老婆

能夠喺英國有一間以自己名字為名嘅學校都幾威，但Eason話暫時未必做得到，唔知佢講真定講笑，佢笑住口話：「係好勁、好虛榮呀！但我呢排手緊，𠵱家屋企需要呢啲嘢（金錢）多啲。我覺得需要貢獻番畀學校，始終喺嗰度學唱歌學咗三年。」佢仲叫記者唔好亂諗，咪話佢老婆（徐濠縈）大使喎！Eason最終話未決定捐唔捐呢筆錢，等佢再考慮先。