蘇格蘭前晚喺歐國盃外圍賽B組迎戰法國贏1:0，爆咗個小冷門。法國教練杜明尼治賽後搵嘢賴，話咸圃頓公園球場啲執波仔用奸招，喺執波嗰陣時執得鬼咁慢，特登嘥晒啲時間，佢哋先會輸波。查實法國陰溝裏翻船，除咗係主隊蘇格蘭踢出賽前部署，仲同佢哋把握唔到有關，講真句執波仔嘥得幾多時間，杜帥認真冇風度。