官恩娜（Ella）日前出席新城公開活動時，遭男狂迷眾目睽睽下箍頸強吻嘴唇，引起各界人士關注，不過商台DJ、男子組合ILoveYouBoyz（艾粒）前日出席活動時，卻拿Ella被非禮一事來開玩笑，失實地重演案件，行為過火。據知艾粒自知貪玩惹禍，已致電Ella道歉，記者昨日向Ella求證時，她只說：「總之我知道佢哋純粹娛樂，唔係刻意想令我唔開心，我亦冇hardfeeling，我唔想件事愈搞愈大。」
艾粒事件惹來群星及網友譴責批評，指他們罔顧被害人感受，而Ella被非禮也令圈中女星人人自危，更有人計劃學自衞術保護自己。此外，新城高層朱明銳昨與Ella同場出席公開活動時，除送花慰問伊人外，更就艾粒事件說：「喺呢個時候咁玩人，就有心理準備俾人玩番。」
採訪：馬建華、張俊銘
攝影：林德雄、陳慧安、陳偉權
何韻詩：
喺人哋傷口灑鹽
「ILoveYouBoyz兩個一向語無倫次，好貪玩，我覺得佢哋有少少喺人哋傷口灑鹽。作為女藝人，對呢件事有好大危機感，但自己唔驚，可能我夠惡，試過有人走埋嚟撩我，我會勁睥佢，隨時準備鬧人，兼且我係空手道啡帶，不過，我未試過俾人非禮，如果發生嘅話，一定兩敗俱傷。」
鄭丹瑞：
應清楚自己界線
「ILoveYouBoyz呢個組合大家都知佢哋係好癲得，但係點玩都應該有個界線，如果佢哋係喺電台節目咁做，就應該交由電台方面管教。如果係唱片宣傳活動，就應該交番畀佢哋公司去傾，睇吓係咪應該咁去玩。佢兩個又係DJ又係歌手，所以要清楚知道自己嘅界線應該去到邊，做任何事之前都要清楚自己嘅身份係乜，呢樣嘢要小心留意。」
啤梨葉文輝：
佢哋係咪博出位？
「艾粒咁做對女藝人係一種壓力，變成笑話唔係咁好，講笑要睇情況，傷害唔到人點講都得，但令到香港其中一個人受傷害，自己就應該深思熟慮。佢哋係咪博出位？呢行嘅人好多類嘅，如果令到人唔開心，就唔好做呢啲嘢。我雖然係男仔，但都試過俾女仔攬住，覺得好抗拒。」
鄧穎芝：
艾粒會教壞歌迷
「佢哋真係好衰，討論就OK，但人哋已經好唔開心，講呢件事好正常，但攞嚟笑就唔OK。話侮辱女性就唔講得，誇張咗，但令到Ella唔開心囉。佢哋咁做會帶壞風氣，實有人去模仿，教壞歌迷，佢哋應該同Ellasaysorry，Ella好慘，錫落個嘴度好dirty。」
陳敏之：
冇理由俾人侵犯
「我睇完Ella俾人強吻單新聞覺得好恐怖，好得人驚，我自己就未試過有呢啲fans，不過有一次有個男仔喺一個商場活動上，都做出一啲令我好嬲嘅行為，佢當時喺台上係咁對住我講我愛你，又不停係咁爆粗。經過Ella呢件事，如果以後出席公開活動要揀人上台玩遊戲，我一定會揀女仔，我作為公眾人物出嚟娛樂大家，冇理由要俾人侵犯。」
利嘉兒：
小朋友冇諗後果
「我覺得Ella好慘，𠵱家啲小朋友冇諗過後果，只要出風頭出位就得。三年前我做普通話節目主持就經常收到一個男fans嘅信，內容話你係我老婆，你走唔甩，後來我發現出席活動有個古怪男人用長鏡影我，每當我發現佢，佢就會走咗，之後我將信交畀TVB節目監製，同每次出席活動都通知保安，大半年後就冇見過個男人出現。」
陳奕迅：
艾粒都係講吓笑
「我都覺得會幾緊張，因為唔知嗰個人有冇病菌㗎嘛！呢個係衞生問題，點知有冇乜嘢傳染病。至於ILoveYouBoyz，我諗佢哋都係講吓笑，不過我好難有任何嘢講，因為平時我講嘢都冇乜人笑，仲話唔知我講乜。」
戴夢夢：
林子萱講法好爆
「我諗艾粒唔係有心笑Ella，可能有人對於佢兩個嘅表達方式反感，我相信佢哋唔係有心。側田鬼仔性格，佢可能係用錯字眼啫。但係林子萱嘅講法好爆喎，佢咁講唔係幾好囉，乜嘢叫做騷在骨子裏呀？羊就騷啫，我實撐Ella。」
