記得大半年前推出N6111嗰陣,個個被佢圓潤光滑嘅番梘外表所迷惑!尤其追加粉紅色版本之後,姣到連男人都想據為己有!不過唔少人用過後覺得N6111滿載鑊氣,例如易Hang機、鈴聲細聲、甚至滑蓋推得唔順等都有人講。諾記埋頭開發改良版後繼機,呢部N5300日前先喺杭州發布會曝光,水貨已率先抵港,佢恃住圓渾推蓋特性,延續番梘王美譽,小記更拎住佢訪問多名MK(旺角)子民睇法,幾乎個個有讚冇彈,睇嚟N5300終於能夠為N6111平反!
記者:陳國輝 攝影:譚盈傑
ImageGirl:豆豆
Apple 85分(左)
喇叭大聲咗好多,而且音色仲幾清楚,最正係按鍵夠大粒,冇N6111咁難㩒。
Queenie 70分(右)
我一向都好鍾意Nokia機介面夠User-friendly,呢次仲專為音樂功能而改變,又方便咗!
Cherrie 65分
「音質絕對好過N6111好多,但係Keypad上面啲掣㩒得多好容易甩色,冇咁靚。」
郭小姐 60分
「播歌夠大聲,不過啲音樂掣好容易碰到,至於影相反應都幾慢,要企定定影先得!」
Ella 80分(左)
「播歌嗰陣Feel到部機好震,唔知易唔易壞,不過介面就相當簡便,好易用!」
Sue 75分(右)
「我覺得整體功能都撈得快過N6111,只可惜相機快門有時差問題,永遠都係慢少少。」
Alan 75分
「以前都曾經玩過N6111,今次試番呢部N5300,覺得介面反應快咗好多,玩得好順。」
Ice 80分
「我覺得N6111外形Cutie啲,但係呢個芒比較大,最啱打機玩,至於鈴聲就非常之勁!」
李先生 50分
「可能太嘈,播歌我聽得唔係咁清楚,較可惜係得130萬像素。」
先達Sales解釋,今次呢批水貨全部來自馬來西亞,顯示方面僅支援中文簡體及英文,據講應該仲有藍、黑兩隻顏色,不過來貨勁少,成個場暫時只得紅色一款,睇落都唔算好搶眼!但係售價就比想像中便宜得多,官方原定為250歐元(約港幣$2,500),但唔夠一個星期,水貨已經從開賣價$2,480極速插水至$1,980,足足跌$500咁多,若然齋用嚟聽歌嘅話,應該算幾抵玩!
兩吋芒險勝N6111
唔少玩家仍然好鍾意番梘王呢款造型,不過有部份女性始終嫌N6111太過的骰,有時仲細到連數字Keypad都㩒錯,為咗靚而放棄方便性,似乎唔係咁值得!可能N5300真係為平反而嚟,今次機身雖然稍為長高咗1/6,而且重量亦增加咗20g,但睇落仍算的骰,連帶好處係按鍵大粒易㩒咗,彩芒闊度更由以前嘅1.8吋提升到2吋,好多旺角子民試玩過之後都大呼過癮!不過呢次要彈嘅係用錯物料,有幾位受訪者拎起部機仲未試玩之前,第一時間就話好膠,感覺似玩具多過手機,另外仲有人彈機身用紅配白、銀雙色唔多襯,最後小記唯有講句:「你哋仲未見過藍、黑兩款色,可能襯好多呢?」
行人專區內鬥嘈
若果想試吓個喇叭夠唔夠大聲,走入旺角行人專用區測試可能最有說服力!小記遇着當日又係紅色假期,兼且有唔少街頭「賣藝」,路過已經覺得勁嘈。不過開着N5300播歌嗰陣,仍然好清楚聽到部機唱緊乜,甚至打開裏面隻「猜歌名」遊戲俾受訪者試玩,佢哋依然成功估中晒,咁就證明咗呢個手機喇叭夠響又夠利啦!但話時話,雖然呢部機大賣音樂專用鍵Design,但係好多玩家反而覺得佢好睇唔好用,尤其當平時放部機入褲袋或者手袋仔嗰陣,如果唔覺意撞一撞,就好容易㩒錯個Play歌掣,萬一大半日不停播歌,啲電玩晒都唔知,咁咪仲灰!
PROFILE
制式:GSM三頻
體積:92×48×20.7mm
重量:106g
屏幕:26萬色TFT彩芒
通話時間:180分鐘
備用時間:250小時
主要功能:機側音樂專用鍵、130萬像素相機、立體聲喇叭、MP3播放器、立體聲藍芽、支援2GBMicroSD卡
售賣點:T-OneMobile(26289090)