攞棵菜雕花都已經難，仲要蒙住眼嚟雕就真係難上加難。不過，攞過「2005年度中國優秀廚師──中華金廚獎」、「滿漢全席全國電視烹飪擂台」台主周忠亭師傅就冇有怕，唔單止自己表演，仲要開班授徒，教一班小朋友蔬果雕刻嘅絕技。
小朋友雕成點八方就唔知，但睇見周師傅嘅製成品，又真係要讚吓佢夠晒心思，事關周師傅專登設計咗個金紫荊雕刻送畀香港人，你話幾有我哋心呢！八方諗返轉頭，最近嚟香港獻技嘅國內大師傅，個個都專登設計啲有香港特色嘅嘢，咁啱件件都係紫荊花，睇嚟煲呔成日攬住唔放嘅飛龍標誌，要追到紫荊花成為香港象徵，仲有排佢追。