浸大噚日筵開約170席，慶祝創校50周年，特首煲呔曾都有到賀，但唔知係咪因為校長吳清輝講太多開場白，搞到煲呔祝完酒後，連翅都食唔到就滾水淥腳咁，急急鬆人，唔通同曾太要趕下一場？
大會冇安排煲呔致辭，得吳清輝一個齋talk，佢就數咗浸大好多威水史，又話浸大創咗唔少香港嘅第一喎！（唔知佢有冇數埋，自己係第一個俾人傳係共產黨員嘅大學校長呢？）
食完飯之後，浸大又搵咗校友歐瑞強同張德蘭唱歌助興，但啲校友好鬼忙碌，個個趕住搵番以前啲老師同埋同學影合照，難得咁多校友喺度，校方梗係乘機叫佢哋捐錢啦，好彩啲校友都識做，浸大今晚真係進賬唔少。