DeepV女子踩着豆零踭，從佐敦道乘的士前往尖沙嘴彌敦道，抵達目的地後，咪錶顯示費用$19.2，但DeepV女堅持應是15元。司機與乘客雙雙下車理論，DeepV女拒絕付錢，還以極重的鄉音爆粗口狂罵司機，引來途人圍觀。
穿吊帶裙斜孭黑手袋的DeepV的士阿姐，一派自由行旅客裝扮，指着司機怒罵時雙手叉腰，威風八面。現場是尖沙嘴彌敦道，司機按咪錶收19.2元，DeepV心中則另有咪錶，認為車費應為15元，拒絕多付4.2元。
「佐敦道嚟𠵱度十九個二，佢係都要話十五蚊，我畀張飛（票據）佢，叫投訴佢又唔要，係咁喺度嘈。」的士司機落車要求街坊評理，DeepV女就跟住落車，當眾爆粗辱罵司機。操極重鄉音的她，一輪急攻，不斷重複一句六個字的常用廣東粗口，又大叫：「你蝦我大陸人呀？」
鄉音爆粗 拍打車身
DeepV女極度火爆，多次拍打的士洩憤，大量途人駐足看熱鬧，還傳來陣陣笑聲。司機沒好氣，惟有抽口煙冷靜自己，其後報警求助，爭執過程收錄在YouTube的「尖沙嘴蘇絲」短片。
市區的士司機聯委會主席郭志標說，內地旅客經常與的士司機爭拗：「我試過報警告佢哋唔畀錢，結果差人幫佢哋畀。」他說，內地人習慣了不按咪錶付錢：「啲自由行好興係咁，自己覺得應該畀幾多，劈低錢就走，司機都冇佢符。」
