講到「帝國」反擊，試問又點可以唔提「大英帝國」呢？英格蘭前日主場失威，畀馬其頓悶和，搞到滿地眼鏡碎，禮拜三仲要作客應該係同組最強對手克羅地亞，想反撲並唔容易。
克軍剛大炒安道爾
講到尾，射手朗尼唔見咗對射門鞋、中場大腦謝拉特停賽，而克羅地亞剛啱大炒安道爾7蛋，平咗球隊歷來贏波最大比數，此消彼長。對安道爾省入4粒，被喻為「新柏素」嘅巴素利前鋒柏域，頂上功夫唔講得笑，對住泰利都有權張牙舞爪。
兩年前歐國盃，英軍贏過克羅地亞4:2，但對手之後喺正規賽事未再失多過兩球，就算克羅地亞繼續有達拉祖史拉、列柏錫同奧歷掛免戰牌，一樣唔怕你。
忽發其想，唔知英格蘭領隊麥卡倫有無諗過重召「萬人迷」碧咸呢？實際啲，想贏番場，都要靠踢國際賽醒過踢利物浦嘅高治囉。
周三賽程
克羅地亞VS英格蘭
開賽時間：香港時間周四1:00am
直播：有線63台