噚日中環遮打道有好多對男男女女、大大細細嘅腳印；不過，啲腳印並唔係菲傭或者印傭留低，而係800幾位參加咗獅子山青年商會主辦「義人同步展關懷」活動嘅善心人留低㗎。
佢哋當中有學生、長者同埋智障人士，雖然大家高矮肥瘦各不同，但大家手拖手玩二人三足時就非常合拍喎，結果用咗24分鐘，行咗約近50公尺嘅遮打道，成績唔錯，主辦單位打算將呢個紀錄申請列入健力士世界紀錄大全㖭。
立法會主席范徐麗泰同公民黨立法會議員梁家傑係呢個紀錄嘅見證人。梁大狀成場睇得非常肉緊，仲話從來估唔到，50公尺咁短路，都要用成幾十分鐘先走得完。下次Alan不妨約煲呔玩二人三足，睇吓兩位大熱特首候選人啱唔啱key吖。