追月夜，爆冷夜，法、英、荷等勁旅相繼於歐國外失分，禮拜三必求反撲，務求攞番個彩。上述強隊周中比賽多數無直播，但不乏強弱懸殊戲碼，波迷總會關心有冇「大手交易」。話就話周中無英超聯，查實幾隊強隊都靠英超射手領軍，誓要上演一幕《帝國反擊戰》，英超躉一樣不愁寂寞。
文：藍鑽石
追月「冷」風吹，法國躉最空虛。任何人睇完法蘭西球員圍剿蘇格蘭，最後竟敗走咸圃頓公園，應該都覺得幾無厘頭，假如運氣同把握得好啲，法國上半場應該已經攻入蘇格蘭3球，幾時輪到主隊球員卡達維入波後也文也武？法國輸波並唔代表無實力。
法國兵正摩拳擦掌，禮拜三返回主場撲擊B組最弱對手法羅群島，唔乘機出氣等幾時？亨利、查斯古特腳風唔多順，搵法羅群島門將練靶最啱數。翻查法國近半年主場成績：贏墨西哥1:0、勝丹麥2:0、勝中國3:1同埋贏世界盃冠軍意大利3:1，今次鬥弱隊，主場5連勝在望。
此「法」不如彼「法」
法羅群島近年表現確實有進步，但恐怕仲要一段時間至能夠真正擺脫「魚腩」行列。話晒隊波踢完3場波失13球，同安道爾、聖馬力諾同屬有球必應。由賭波角度出發，近兩輪國際賽都有大手交易──繼上個月德國狂數聖馬力諾13球，上個禮拜六亦有捷克、克羅地亞開「主其他」；今個周中賽序，橫睇掂睇，都以法國開「主其他」機會最大。
順帶一提，周中B組有直播嘅係意大利作客格魯吉亞。法國輸畀蘇格蘭，間接提高意大利爭出線嘅難度。難怪唔少網民都講緊，意軍隨時被夾死，出唔到線囉。
周三賽程
法國VS法羅群島
開賽時間：香港時間周四3:00am
直播：/