韜韜踩出新界開分店，網友好開心，tetsuand放料：「韜韜間大榮華圍村菜喺九龍灣開左（咗）分店呀！」ref_ptr話：「去到一定要食奶黃馬拉糕同五味雞，每次必食！！」psauada就話：「以後唔使山長水遠咁入元朗見佢啦~~滔滔（韜韜）好好人，好好傾㗎~~」網友無呃你，韜韜的確Nice，個肚腩的確好大，講起圍村菜仲滔滔不絕，嚟開飯，仲有古聽㖭呀。
記者：黃若茵
攝影：譚盈傑
圍村菜不時不食
圍村菜等於盆菜咁簡單，No囉，韜韜話圍村菜好有內涵：「首先要不時不食，不鮮不食，鄉村地方種到乜就食乜，所以好受季節影響。另外菜式要講求實際，村民從事體力勞動工作，食嘅嘢一定要飽肚。第三因為村民有豐富種植同飼養經驗，所以對食材料有深刻了解，煮嘢食好執着，唔係靚嘢唔畀客人食。」
「大榮華」新店進駐九龍灣，熟客仔開心到鬧佢：「叫你開間大啲㗎啦，呢間又係咁細㗎？」計落，元朗總店開業已8年，韜韜Fans多，所以要落新店坐鎮，「呢度剛開舖，點心檔得8個師傅做唔切，要加到11位。」店舖另一賣點係點心平，$12碟仲唔收芥醬酸菜，小菜一律$48，同區茶樓酒家唔止呢個價，何況仲可以見到韜韜本人？邊食邊聽佢講圍村菜文化，又抵番唔少喇。
炒長遠 $48
韜韜：「鄉下人除咗大仔，其他仔一到15歲就要出外搵食，屋企餞行就會用銀蝦粉絲煲蜆湯。蜆肉難離殼，代表大仔留守，銀蝦隨河水流到大海蛻變成白蝦，代表出遠門細仔以適應新生活。𠵱家搵唔到銀蝦，我簡化做法，改蟹肉加蛋炒粉絲。」
五味雞 午市$65晚市$48
韜韜：「五味雞最緊要用頭抽。𠵱家養雞嘅飼料會令雞有腥味，所以仲要加埋花椒、八角、草果、桂皮等辟走雞嘅腥味。我淨係用新鮮雞唔用冰鮮雞，肉質肯定嫩滑好多。」
臘腸卷 $12
韜韜：「一定用一整條臘腸，唔可以切開一半，否則臘腸漏晒油就唔好食。」整條臘腸食的確好唔同，咬落卜卜聲好爽脆。
奶黃馬拉糕 $48
韜韜：「馬拉糕加入奶黃，分3層去蒸好鬆軟，周潤發好鍾意食，仲次次都打包好幾個走，拎返屋企蒸番熱又食得！」
陳皮豆豉爆蝦 $48
韜韜：「以前喺元朗用河蝦，蝦頭好多膏好正㗎！𠵱家只可用養蝦，以陳皮豆豉爆香，成隻蝦連殼食，鹹鹹哋味道剛剛好。」
食客有Say
搵食攻略
大榮華（21487773）
地址：九龍灣宏開道8號其士商業中心1樓
營業時間：7:45am-11:15pm
交通：九龍灣地鐵站A出口
座位：400個
人均消費：$50-$60
最好賣：五味雞，日賣300多隻
註：網友點撐，可瀏覽： http://www.uwants.com/viewthread.php?tid=2811147&pid=45911777&page=1&extra=page%3D1#pid45911777